தாகம் தணித்த இந்துக்கள்! தமிழன் எக்ஸ்பிரஸ் கேள்வித் திருவிழா 07

*தொழுகை நடக்காத இடத்தைக் கேட்டு வேலூரில் நீங்கள் நடத்திய ஆர்ப்பாட்டத்தால் இந்து-முஸ்லீம் ஒற்றுமை பாதிக்காதா? கு. மணி, திருச்சி.

தொழுகை நடக்காத இடத்தை நாங்கள் கேட்கவில்லை. வரலாற்றுச் சிறப்பு மிகுந்த வேலூர் கோட்டையில், கி.பி. 1750ல் முஸ்லீம்கள் தொழுகை நடத்துவதற்காகக் கட்டப்பட்ட நவாப் பள்ளிவாசலில், ஆங்கிலேயர்களின் ஆட்சியின்போது நிறுத்தப்பட்ட தொழுகை மீண்டும் நடக்க அனுமதிக்க வேண்டும் என்பதுதான் எங்கள் கோரிக்கை.

வேலூர் கோட்டை இந்தியாவின் மதச் சார்பின்மைக்கு ஓர் எடுத்துக்காட்டாக அமைந்துள்ளது. 136 ஏக்கர் பரப்பளவுக் கொண்ட வேலூர் கோட்டையில் ஸ்ரீ ஜலகண்டேஸ்வரர் ஆலயமும், தென்னிந்திய திருச்சபையின் தேவாலயமும், நவாப் பள்ளிவாசலும் அமைந்துள்ளன.

1921ல் இந்திய அகழ்வாராய்வு நிறுவனம் இந்த மூன்று வழிபாட்டுத் தலங்கள் உட்பட 136 ஏக்கர் கோட்டை முழுவதையும் பழங்கால நினைவுச் சின்னப் பாதுகாப்புச் சட்டத்தின்படி கையகப்படுத்திக் கொண்டது.

1806ல் வேலூர் கோட்டையில்தான் முதலாவது விடுதலைப் போராட்டம் நடைபெற்றது. அப்போது அங்கு சிறை வைக்கப்பட்டிருந்த மாவீரன் திப்பு சுல்தானின் வாரிசுகளின் தூண்டுதலினால் உந்தப்பட்டு, ஆங்கிலேயர் படையில் இடம் பெற்றிருந்த இந்து-முஸ்லீம் படை வீரர்கள் ஒன்று சேர்ந்து நடத்திய மாபெரும் புரட்சி வேலூர் கோட்டையில் அரங்கேறியது.

ஏராளமான ஆங்கிலேயப் படையினரை வெட்டி வீழ்த்தி, ஆங்கிலேயர்களின் யூனியன் ஜாக் கொடியைக் கீழே இறக்கி விட்டு, திப்பு சுல்தானின் கொடி அப்போது வேலூர் கோட்டையில் ஏற்றப்பட்டது.

பிறகு இந்தப் புரட்சி முறியடிக்கப்பட்டாலும்கூட வெள்ளைக்காரர்களை வீழ்த்த இயலும் என்ற மன வலிமையை இந்தியர்களுக்கு அளித்தது வேலூர் புரட்சி.

இதன் பிறகுதான் ஜலகண்டேஸ்வரர் ஆலயத்திலும், நவாப்  பள்ளிவாசலிலும் வழிபாடு நிறுத்தப்பட்டது என்ற ஒரு கருத்தும் உள்ளது.

நாடு விடுதலைப் பெற்ற பிறகு வேலூர் இந்துக்களும்-முஸ்லீம்களும் முறையே ஜலகண்டேஸ்வரர் ஆலயத்திலும், நவாப் பள்ளிவாசலிலும் வழிபாடு நடத்தப்பட வேண்டும் என்று கோரி வந்தனர்.

1950களில் வேலூருக்கு வருகை புரிந்த அன்றைய துணை குடியரசுத் தலைவர் சர்வப்பள்ளி ராதாகிருஷ்ணன் அவர்களிடம் இந்தக் கோரிக்கையை வைத்துள்ளனர். இந்தக் கோரிக்கைகள் வைக்கப்பட்டபோதெல்லாம் இன்னும் வெள்ளைக்காரன் ஆட்சிதான் நடைபெறுகின்றது என்ற மனநிலையில்தான் இந்திய அகழ்வாராய்வு நிறுவனம் பதில் அளித்து வந்துள்ளது.

"1921ல் வேலூர் கோட்டையைக் கையகப்படுத்தியபோது ஜலகண்டேஸ்வரர் ஆலயத்திலும், நவாப் பள்ளிவாசலிலும் வழிபாடு நடைபெறவில்லை. எனவே இப்போது வழிபாட்டை அனுமதிக்க முடியாது' என்று ஆங்கிலேயர் எழுதி வைத்த சட்டத்தை விடுதலைப் பெற்ற பிறகும் இந்திய அகழ்வாராய்வு நிறுவனம் சொல்லி வருகின்றது.

இந்த நிலையில்தான் 1981, மார்ச் 16 அன்று அதிகாலை வேலூர் இந்து சகோதரர்கள் சத்துவாச்சேரியில் உள்ள ஒரு கோயிலிலிருந்து சிவலிங்கத்தை எடுத்து வந்து ஜலகண்டேஸ்வரர் ஆலயத்தில் வைத்து வழிபாட்டை ஆரம்பித்தனர்.

இதனை நாங்கள் சரியான நடவடிக்கை என்று கருதுகிறோம். அகழ்வாராய்வு நிறுவனத்தின் ஆங்கிலேய சட்ட மோகத்தின் முகத்தில் இதன் மூலம் வேலூர் இந்து பெருமக்கள் கரி பூசினர்.

இந்த நிலையில் நவாப் பள்ளிவாசலிலும் தொழுகை நடத்த அனுமதிக்க வேண்டும் என்று முஸ்லீம்கள் கோரும் போதெல்லாம் இந்திய அகழ்வாராய்வு நிறுவனம் வழிபாடு நடத்த அனுமதி மறுத்து வருகின்றது.

1921ல் வேலூர் கோட்டையைக் கையப்படுத்தியபோது எது எந்த நிலையில் இருந்ததோ அதனை அப்படியே (Statua quo) தாங்கள் பராமரிக்க வேண்டியுள்ளது என்று அகழ்வாராய்வு நிறுவனம் கூறிக் கொள்கிறது. ஆனால் புதிய அரசு அலுவலகங்கள் கோட்டைக்குள் அமைக்கப்படுகின்றன. இதனை எந்தச் சட்டத்தின்படி அந்நிறுவனம் அனுமதிக்கின்றது?

ஜலகண்டேஸ்வரர் ஆலயம் தவிர்த்து மூன்று சிறிய கோயில்கள் கோட்டைக்குள் புதிதாக அமைக்கப்பட்டுள்ளன. இதனை அகழ்வாராய்வு நிறுவனத்தின் எந்தச் சட்டம் அனுமதித்தது?

ஜலகண்டேஸ்வரர் ஆலயத்தின் தேர் நிறுத்தப்படுவதற்காக ஷெட் அமைப்பதற்கு எந்த அகழ்வாராய்வு சட்டத்தின்படி அனுமதி அளிக்கப்பட்டுள்ளது? இந்தக் கேள்விகளெல்லாம் எழுப்புவதினால் இவற்றை அனுமதிக்கக்கூடாது என்று நான் சொல்லவில்லை.

இவற்றையெல்லாம் அனுமதிக்கும் போது, "கோட்டை பள்ளிவாசலுக்குள் மட்டும் தொழுகை நடத்த அனுமதி அளிக்க மாட்டோம்' என்று அகழ்வாராய்வு நிறுவனம் சொல்வது ஒரு தெளிவான பாரபட்சமாகும்.

வேலூர் கோட்டை பள்ளிவாசல் பிரச்சினை தொடர்பாக இந்து -முஸ்லீம் பிரச்சினை எழுவதற்கு வழியில்லை. ஏனெனில் இந்தப் பிரச்சினை முஸ்லீம்களுக்கும் அகழ்வாராய்வு நிறுவனத்திற்கும் இடையில் நடைபெறும் ஒன்றாகும்.

"ஜலகண்டேஸ்வரர் ஆலயத்தில் இந்துக்கள் வழிப்பட அனுமதிக்க வேண்டும்' என்று 1981ல் முஸ்லீம்கள் கருத்து தெரிவித்தது போல் இப்போது வேலூர் இந்து சமயப் பெருமக்கள், "வேலூர் கோட்டை பள்ளிவாசலுக்குள் தொழுகை நடத்த அனுமதிக்க வேண்டும்' என்று முஸ்லீம்களுக்கு ஆதரவாகக் குரல் கொடுத்துள்ளனர்.

வேலூர் கோட்டையில் அமைந்துள்ள ஜலகண்டேஸ்வரர் ஆலய தர்ம நிறுவனத்தின் அறங்காவலர் குழுவைச் சேர்ந்த திரு. பரமசிவம் அவர்களும், திரு. சண்முகம் அவர்களும், வேலூர் சட்டமன்ற உறுப்பினர் திரு. ஞானசேகரனும் மிக வலுவாக முஸ்லீம்களின் கோரிக்கையை அகழ்வாராய்வு நிறுவனம் ஏற்க வேண்டும் என்று கூறியுள்ளனர்.

திரு. கார்த்திக் அவர்களைத் தலைவராகக் கொண்ட வேலூர் நகராட்சி, "வேலூர் கோட்டை பள்ளிவாசலில் தொழுகைக்கு அனுமதிக்க வேண்டும்' என்று தீர்மானம் நிறைவேற்றியுள்ளது.

இது மட்டுமல்ல.... மே 9 அன்று சுட்டெரிக்கும் 106 டிகிரி வெயிலில் நாங்கள் போராட்டம் நடத்திய போது வேலூர் இந்து மக்கள், தாகமெடுத்த எம்தொண்டர்களுக்கு தண்ணீர் கொடுத்து தங்களின் ஆதரவை வெளிப்படுத்தினர். இவையெல்லாம் இது ஒரு இந்து-முஸ்லீம் பிரச்சினை அல்ல என்பதற்கான தெளிவான சான்றுகள்.

* கட்டுப்பாடு மிக்க கட்சி த.மு.மு.க. என்று கேள்விப்பட்டேன். கட்சியில் கணக்கு வழக்குகள் எப்படி?

சோ. தர்மராஜ், திருமுல்லைவாயில்.

திறந்த புத்தகம். தெளிவாக, அமைப்பின் அரங்குகளில் கணக்குகள் சமர்பிக்கப்படுகின்றன. வருமான வரித் துறையினருக்கும் முறையாக சமர்பிக்கப்படுகின்றது.

2004ல் சுனாமி தாக்கியபோது பாதிக்கப்பட்ட மக்கள் நிவாரணத்திற்காக வசூலிக்கப்பட்ட பணம் எப்படி செலவுச் செய்யப்பட்டது என்பதை பொதுமக்கள் கூடிய சிறப்பு அமர்வு ஒன்றின் முன்பு சமர்பித்தோம்.

இவ்வாறு செய்த வேறு எந்தவொரு அமைப்பும் தமிழகத்தில் உண்டோ?

* உங்களுக்குப் பாராளுமன்ற ஆசையா? சட்டமன்ற ஆசையா? ச. மணிமுத்து, கத்தப்பட்டி.

அரசியல் என்பது கேடிகளின் கடைசிப் புகலிடம் என்று சொல்வார்கள். இந்த அவலநிலையை மாற்றி அமைத்து, நேர்மையான-தூய்மையான மக்கள் சேவகர்களின் முதல் புகலிடம் அரசியல் என்ற நிலையை உருவாக்கி இந்த மனநிலையுடையவர்களை நாடாளுமன்ற, சட்டமன்ற உறுப்பினர்களாக உருவாக்கும் ஆசை மட்டுமே எனக்குண்டு.

* காயிதே மில்லத் போன்றவர்கள் வரிசையில் ஏதாவது ஒரு அரசியல் தலைவரைத் தமிழகத்தில் நீங்கள் சுட்டிக்காட்ட முடியுமா? இரா. நாகப்பன், சேலம்.

காயிதே மில்லத் என்ற அரசியல் தலைவரின் மெச்சத் தக்க பல நற்பண்புகளில் விஞ்சி நின்றது அவரது எளிமை. அதே எளிமையைப் பின்பற்றிவரும், ஒரு தமிழக அரசியல் தலைவர் நம்மிடையே இன்று வாழ்ந்து வருகிறார்.

அவருடன் 1999 முதல் நெருங்கிப் பழகி அவரது எளிமையைக் கண்டு நான் நெகிழ்ந்து போன சந்தர்ப்பங்கள் பல உண்டு. காயிதே மில்லத் போன்று விடுதலைப் போராட்ட வீரராகவும் விளங்கிய அவர், இந்திய கம்யூனிஸ்ட் கட்சியின் மூத்த தலைவர் தோழர் நல்லக்கண்ணு ஐயா அவர்கள்தான்.

* காதல் உங்களுக்குக் கசக்குமா? இனிக்குமா? இரா. தங்கம், வலங்கைமான்.

அளவை மீறினால் அமிழ்தமும் நஞ்சாகும் என்பதே எனது பதில்.

கேள்வித் திருவிழா (22.05.2008-தமிழன் எக்ஸ்பிரஸ்)